سوبر مان #

سعات كتير بنشوف اعلانات فى الجرنال فى الوظائف الخاليه يكون مطلوب شاب حديث التخرج و خبره لا تقل عن 10 سنين و السن لا يزيد عن 25 سنه و يكون عنده رخصه سواقه و عربيه و يكون ساكن فى الزمالك .... كل ده طبعا صعب تلاقيه غير فى شخص واحد بس .. سوبر مان ... على غرار اعلانات الوظائف اللى من النوع ده فكرت اكتب مواصفات فتى احلامى . الموضوع كله فور فن و مش دى اللى تفسي طبعا يكون فيه الحاجات دى ..
الشكل
الطول مايقلش عن 180 سم .. يعنى بقي حاجه كده نخله
السن مايقلش عن 23 و مايزيدش عن 29
لون البشره : برونزى
اهم حاجه مايكونش تخين ولا رفيع .. يعنى يكون جسمه رياضى
عنيه تكون حلوه
طبعا لازم يكون وسم

صفات الشخصيه
مش عصبي .. و بيقدر يتحمل غبائي احيانا و حزنى احيانا و تقلب مزاجى دائما
يكون بيحبنى .. الحب اللى بجد اللى يخليه يبيع الدنيا كلها عشانى
مايكونش خاين.. لانى بقرف اوى من اللى بيخون ...اللى بيخون مايستحقش اى حب
مايكونش ارتبط فى اى علاقه من اى نوع قبليا
يكون بيعرف يتعامل مع النساء ... التعامل مع النساء مش سهل ابدا .. زى التعامل مع قطعه كريستال ممكن تقع من ايدك تبقي مليون حته .. و استحاله ترجعها زى ما كانت
يكون متدين و بيخاف ربنا .. يتقى الله فيا
بيحب الاطفال

الظروف الاجتماعيه لازم تكون على مستوى يليق بيا
يكون بيشتغل و دخله على الاقل 2000 جنيه فى الشهر
عنده شقه تصلح للاستخدام الآدمى فى كفر عبده او مصطفى كامل
امممممممم ايه تانى مش فاكره دلوقتى لما افتكر حاجه جديده هاقول


من تتوافر فيه الشروط يبعت ال
cv
مع صوره حديثه ... بلاش الصوره بتاعت تقديم الكليه دى
على الايميل
يلا بقي يا شباب كل واحد يقول على مواصفات فتاه احلامه ... قصدى السوبر جيرل بتاعته
و لو حد من البنات عنده اقتراحات يقولها على طول
ماتخافوش هابقي اعملكو نسخه كوبي و بيست